ڕۆژا چارشەمبی ڕێککەڤتی (٢٠٢٣/٥/١٧) شاندەکێ ژ زانکۆیا زاخۆ، کۆ پێکهاتبوون ژ بەرێز (پ.د. ناظم سليمان عبدالعزيز) سەرۆکێ زانکۆیا زاخۆ، دگەل بەرێزان (پ.د. شێرزاد زکریا محمد) ڕاگرێ فەکۆلتیا پەروەردە و (پ.هـ.د. عثمان عبدالكريم عمر) ڕاگرێ کۆلیژا پەروەردەیا بنیات، پشکداری کرن د سێیەمین کونفڕانسێ ناڤدەولەتیێ (ستێرلینگ سکۆل) یێ تایبەت ب سیستەمێ پەروەردە و فێرکرنێ ل هەرێما کوردستانێ "ICET" ل باژێرێ هەولێرێ.
ئەڤ کونفڕانسە هاتیە ڕێکخستن ب هەڤکاریا وەزارەتا پەروەردا هەرێما کوردستانێ دگەل وەزارەتا پەروەردا عێراقێ و ئەنجومەنێ بازرگانیا بریتانیا ل عێراقێ، بابەتێ کونفڕانسی تایبەتە ب نفشێ سەردەم (Z, Alpha) و چاوانیا سەرەدەریێ دگەل وان و چاوا دێ مفا ژ شیانێن وان هێتە وەرگرتن، هەروەسا پێشڤەبرنا سیستەمێ پەروەردە و فێرکرنێ ل هەرێما کوردستانێ.
کونفڕانس دێ بۆ دەمێ دوو ڕۆژان بەردەوام بیت و تێدا دێ چەندین پەنەڵێن کرنگ و بابەتێن زانستی هێنە باسکرن و گەنگەشەکرن.